ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠲᠣᠷᠭᠠᠨ ᠬᠠᠷᠠᠭ᠎ᠠ
ᠰᠣᠶᠣᠯ ᠡᠷᠳᠡᠨᠢ
ᠤᠯᠠᠭᠠᠨ ᠮᠦᠴᠢᠷ
ᠨᠢᠭᠡᠨ ᠪᠠᠭᠴᠠ ᠴᠡᠴᠡᠭ ᠬᠡᠮᠡᠬᠦ — ᠲᠠᠳᠠᠯᠠᠭ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/1/18
    ᠨᠢᠬᠡ     ᠣᠷᠠᠨ ᠵᠣᠬᠢᠶᠠᠯ ᠪᠣᠯ ᠵᠣᠬᠢᠶᠠᠯᠴᠢ ᠶᠢᠨ ᠡᠭᠦᠳᠦᠯᠳᠡ ᠶᠤᠮ᠃ ᠡᠨᠡᠬᠦ ᠡᠭᠦᠳᠦᠯᠳᠡ ᠨᠢ ᠬᠡᠳᠦᠢ ᠶᠡᠭᠡ ᠦᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ ᠪᠣᠯ ᠲᠡᠳᠦᠢ ᠶᠡᠭᠡ ᠠᠮᠵᠢᠯᠳᠠ ᠲᠠᠢ ᠪᠦᠳᠦᠭᠡᠯ ᠪᠣᠯᠬᠤ ᠪᠤᠯᠤᠮᠵᠢ ᠪᠤᠢ᠃ ᠨᠢᠭᠡᠨ ᠪᠣᠳᠢ ᠰᠢᠯᠢᠳᠡᠭ ᠣᠷᠠᠨ ᠵᠣᠬᠢᠶᠠᠯ ᠤᠨ ᠪᠦᠳᠦᠭᠡᠯ ᠤᠨ ᠣᠩᠰᠢᠭᠴᠢ ᠶᠢᠨ ᠦᠵᠡᠯ ᠰᠠᠨᠠᠭ᠎ᠠ ᠴᠤᠭ ᠰᠦᠯᠳᠡ ᠳᠤ ᠦᠭᠬᠦ ᠬᠦᠮᠦᠵᠢᠯ ᠪᠣᠯᠣᠨ ᠨᠦᠯᠦᠭᠡᠯᠡᠯ ᠲᠣᠩ ᠶᠡᠭᠡ ᠭᠦᠨᠵᠡᠭᠡᠢ ᠪᠠᠶᠢᠳᠠᠭ᠃ ᠲᠡᠷᠡ ᠨᠢ ᠴᠠᠭ ᠦᠶ᠎ᠡ ᠶᠢ ᠠᠯᠣᠰᠯᠠᠵᠣ ᠪᠣᠯᠣᠨ᠎ᠠ᠂ ᠣᠯᠣᠰ ᠤᠨ ᠬᠢᠯᠢ ᠠᠴᠠ ᠲᠠᠪᠠᠵᠦ ᠪᠣᠯᠣᠨ᠎ᠠ᠃ ᠠᠯᠢᠪᠠ ᠠᠭᠤᠣ ᠶᠡᠭᠡ ᠣᠷᠠᠨ ᠵᠣᠬᠢᠶᠠᠯ ᠤᠨ ᠪᠦᠳᠦᠭᠡᠯ ᠨᠢ ᠪᠦᠷ ᠯᠡ ᠲᠡᠯᠡᠬᠡᠢ ᠶᠢᠷᠳᠢᠨᠴᠣ ᠲᠠᠢ ᠬᠠᠮᠳᠣ ᠦᠨᠢ ᠮᠦᠩᠬᠡ ᠣᠷᠣᠰᠢᠨ ᠲᠣᠭᠳᠠᠨᠢᠬᠤ ᠰᠢᠳᠢᠳᠣ ᠬᠦᠴᠦᠨ ᠲᠠᠢ ᠪᠠᠶᠢᠳᠠᠭ ᠪᠢᠯᠠ᠃     ᠵᠣᠬᠢᠶᠠᠯ ᠪᠦᠳᠦᠭᠡᠯ ᠨᠢ ᠨᠡᠶᠢᠭᠡᠮ ᠤᠨ ᠠᠮᠢᠳᠣᠷᠠᠯ ᠤᠨ ᠲᠣᠰᠬᠠᠯ ᠪᠣᠯᠬᠤ ᠶᠢᠨ ᠬᠤᠪᠢ ᠳᠤ ᠮᠠᠭᠳᠠᠨ ᠲᠠᠭᠤᠯᠠᠬᠤ ᠬᠡᠷᠡᠭᠳᠡᠢ ᠪᠦᠭᠡᠳ ᠪᠠᠰᠠ ᠢᠯᠡᠴᠢᠯᠡᠬᠦ ᠴᠦ ᠴᠢᠬᠤᠯᠠ ᠲᠠᠢ ᠶᠣᠮ᠃ ᠬᠤᠳᠠᠯ ᠬᠠᠭᠤᠷᠮᠠᠭ ᠨᠢ ᠣᠷᠠᠯᠢᠭ ᠤᠨ ᠶᠡᠭᠡ ᠲᠠᠶᠢᠰᠣᠨ ᠮᠦᠨ᠃ ︽ᠭᠤᠸ᠎ᠠ ᠰᠠᠶᠢᠬᠠᠨ︾᠎ ᠨᠢ ︽ᠦᠨᠡᠨ︾᠎ ᠤ ᠰᠠᠭᠤᠷᠢᠨ ᠲᠡᠭᠡᠷ᠎ᠡ ᠭᠦᠨ ᠦᠨᠳᠦᠰᠦᠯᠡᠪᠡᠯ ᠵᠣᠬᠢᠨ᠎ᠠ᠃     ᠨᠢᠭᠡ ᠵᠣᠬᠢᠶᠠᠯᠴᠢ ᠶᠢᠨ ᠬᠤᠪᠢ ᠳᠤ ᠠᠪᠴᠣ ᠦᠵᠡᠪᠡᠯ ᠶᠢᠷᠳᠢᠨᠴᠣ ᠶᠢᠨ ᠦᠵᠡᠯᠳᠡ ᠨᠢ ᠬᠠᠮᠤᠭ ᠤᠨ ᠴᠢᠬᠤᠯᠠ᠃ ᠨᠡᠶᠢᠭᠡᠮ ᠤᠨ ᠠᠮᠢᠳᠣᠷᠠᠯ ᠪᠣᠯ ᠣᠳᠬ᠎ᠠ ᠵᠣᠬᠢᠶᠠᠯ ᠤᠨ ᠵᠣᠬᠢᠶᠠᠨ ᠪᠦᠳᠦᠭᠡᠬᠦ ᠶᠢᠨ ᠡᠬᠢ ᠰᠣᠷᠪᠣᠯᠵᠢ ᠶᠢᠨ ᠨᠢᠬᠡ᠃ ᠪᠢᠴᠢᠬᠦ  ᠭᠡᠰᠡᠨ ᠰᠡᠳᠦᠪᠯᠡᠭᠰᠡᠨ  ᠮᠠᠲ᠋ᠧᠷᠢᠶᠠᠯ ᠴᠢᠨᠢ  ᠵᠠᠪᠠᠯ ᠴᠢᠨᠣ  ᠬᠠᠮᠤᠭ ᠤᠨ ᠪᠣᠯᠪᠠᠰᠣᠷᠠᠩᠭᠤᠢ  ᠮᠡᠳᠡᠬᠦ ᠵᠦᠢᠯ  ᠪᠠᠶᠢᠬᠤ ᠬᠡᠷᠡᠭᠳᠡᠢ᠃ ᠵᠠᠷᠢᠮ  ᠣᠷᠠᠨ ᠵᠣᠬᠢᠶᠠᠯ ᠪᠣᠶᠣ ᠺᠢᠨᠣ᠋ ᠵᠦᠴᠦᠭᠡ ᠨᠢ ᠶᠠᠭᠠᠬᠢᠭᠠᠳ  ᠲᠠᠩᠳᠠ ᠠᠯᠳᠠᠭ᠎ᠠ  ᠡᠭᠡᠵᠡᠭ ᠲᠠᠢ  ᠪᠠᠶᠢᠭ᠎ᠠ ᠪᠣᠢ  ᠭᠡᠵᠦ ᠦᠨᠳᠦᠰᠦ  ᠶᠢ ᠨᠢ  ᠣᠬᠤᠴᠢᠯᠠᠪᠠᠯ᠂ ᠣᠯᠠᠩᠬᠢ ᠳᠠᠭᠠᠨ ᠵᠣᠬᠢᠶᠠᠭᠴᠢ ᠦᠪᠡᠷ ᠤᠨ ᠢᠯᠡᠷᠡᠭᠦᠯᠬᠦ ᠭᠡᠰᠡᠨ ᠠᠮᠢᠳᠣᠷᠠᠯ ᠢᠶᠠᠨ ᠰᠠᠶᠢᠨ ᠮᠡᠳᠡᠬᠦ ᠦᠭᠡᠢ᠂ ᠵᠣᠬᠢᠬᠤ ᠬᠤᠷᠠᠮᠳᠣᠭᠤᠯᠣᠯ ᠲᠣᠳᠠᠭᠳᠠᠭᠰᠠᠨ ᠠᠴᠠ ᠪᠣᠯᠣᠭᠰᠠᠨ ᠪᠠᠶᠢᠳᠠᠭ᠃     ᠪᠢᠯᠢᠭ ᠰᠡᠷᠡᠯ ᠨᠢ ᠵᠣᠬᠢᠶᠠᠭᠴᠢ ᠶᠢ ᠪᠢᠷ ᠬᠦᠳᠡᠯᠭᠡᠨ ᠵᠣᠬᠢᠶᠠᠨ ᠪᠢᠴᠢᠬᠦ ᠳᠤ ᠬᠦᠷᠦᠭᠦᠯᠳᠡᠭ᠃ ᠲᠡᠷᠡ ᠨᠢ ᠵᠣᠬᠢᠶᠠᠯᠴᠢ ᠣᠷᠠᠯᠢᠭᠴᠢ ᠶᠢᠨ ᠰᠡᠳᠬᠢᠨ ᠪᠣᠳᠣᠯᠬᠢᠯᠠᠯ ᠨᠢ ᠪᠣᠯᠪᠠᠰᠣᠷᠠᠩᠭᠤᠢ ᠪᠣᠯᠣᠭᠰᠠᠨ ᠱᠠᠳᠣ ᠮᠦᠨ᠃ ᠲᠡᠭᠦᠨ ᠤ ᠪᠦᠳᠦᠭᠡᠬᠦᠢ ᠬᠦᠴᠦᠨ ᠦᠷᠨᠢᠨ ᠲᠡᠭᠡᠭᠰᠢᠯᠡᠵᠦ ᠬᠡᠷᠡᠭ ᠪᠣᠳᠠᠰ ᠤᠨ ᠰᠡᠳᠡᠯᠳᠡ ᠠᠴᠠ ᠪᠣᠯᠣᠭᠠᠳ ᠵᠣᠬᠢᠶᠠᠨ ᠪᠦᠳᠦᠭᠡᠬᠦ ᠰᠡᠳᠬᠢᠴᠡ ᠶᠢᠨ ᠵᠠᠮ ᠳᠠᠬᠢ ᠲᠠᠭᠯᠠᠭ᠎ᠠ ᠨᠢ ᠦᠳᠳᠡᠷ ᠨᠡᠬᠡᠬᠡᠭᠳᠡᠮᠡᠭᠴᠡ ᠯᠡ ᠵᠣᠬᠢᠶᠠᠨ ᠪᠢᠴᠢᠬᠦ ᠠᠪᠢᠶᠠᠰ ᠨᠢ ᠣᠷᠭᠢᠯᠵᠣ᠂ ᠨᠢᠭᠡ ᠪᠦᠳᠦᠭᠡᠯ ᠰᠢᠯᠣᠭᠤᠬᠠᠨ ᠵᠣᠬᠢᠶᠠᠭᠳᠠᠨ᠎ᠠ᠃ ᠲᠡᠷᠡ ᠨᠢ ᠶᠠᠭ ᠯᠡ ᠨᠣᠴᠣᠭᠠᠭᠰᠠᠨ ᠴᠦᠳᠡᠩ ᠢ ᠲᠣᠰᠣᠨ ᠤ ᠬᠦᠮᠦᠷᠭᠡ ᠳᠤ ᠰᠢᠳᠡᠭᠰᠡᠨ ᠲᠠᠢ ᠠᠳᠠᠯᠢ᠂ ᠠᠯᠢᠪᠠ ᠬᠡᠷᠡᠭᠴᠡᠭᠡ ᠪᠦᠬᠦᠢ ᠠᠮᠢᠳᠣᠷᠠᠯ ᠤᠨ ᠴᠡᠭᠡᠵᠢᠯᠡᠯ ᠴᠦᠮ ᠲᠦᠷᠡᠯᠵᠢᠨ ᠨᠣᠴᠣᠵᠣ᠂ ᠠᠯᠢᠪᠠ ᠨᠠᠷᠢᠨ ᠵᠦᠢᠯᠡᠰ ᠴᠦᠮ ᠭᠡᠨᠡᠳᠳᠡ ᠭᠡᠷᠡᠯᠳᠣᠨ ᠲᠣᠳᠣᠷᠠᠳᠠᠭ᠃     ᠵᠣᠬᠢᠶᠠᠯ ᠤᠨ ᠭᠠᠷᠴᠠᠭ ᠪᠣᠯ ᠪᠦᠬᠦ ᠵᠣᠬᠢᠶᠠᠯ ᠤᠨ ᠢᠶᠠᠨ ᠨᠢᠳᠣ ᠪᠣᠯᠵᠣ ᠪᠠᠶᠢᠭ᠎ᠠ ᠶᠣᠮ᠃ ᠵᠣᠬᠢᠶᠠᠯᠴᠢ ᠶᠢᠨ ᠨᠢᠳᠣ ᠡᠷᠬᠡᠪᠰᠢ ᠡᠳᠡᠭᠡᠳ ᠬᠢᠷᠠᠬᠠᠢ ᠪᠠᠶᠢᠬᠤ ᠬᠡᠷᠡᠭᠳᠡᠢ᠃ ᠵᠠᠷᠢᠮ ᠬᠦᠮᠦᠨ ᠤ ᠦᠵᠡᠬᠦ ᠪᠠᠷ ᠵᠣᠬᠢᠶᠠᠯ ᠤᠨ ᠡᠬᠢᠯᠡᠯᠳᠡ ᠶᠢ ᠭᠤᠶᠣ ᠰᠠᠶᠢᠬᠠᠨ ᠪᠢᠴᠢᠨ ︽ᠲᠣᠭᠤᠰ ᠤᠨ ᠲᠣᠯᠣᠭᠠᠢ︾ ᠰᠢᠭ᠋᠂ ᠲᠣᠮᠳᠠᠬᠢ ᠠᠭᠤᠯᠭ᠎ᠠ ᠶᠢ ᠨᠢ ᠪᠠᠶᠠᠯᠢᠭ ᠪᠢᠴᠢᠵᠦ ︽ᠭᠠᠭ᠋ᠠᠢ ᠶᠢᠨ ᠭᠡᠳᠡᠰᠣ︾ ᠰᠢᠭ᠂ ᠲᠡᠭᠦᠰᠭᠡᠯ ᠢ ᠨᠢ ᠢᠳᠡᠯᠢᠭ ᠪᠢᠴᠢᠵᠦ ︽ᠢᠷᠪᠢᠰ ᠤᠨ ᠰᠡᠭᠦᠯ︾ ᠰᠢᠭ ᠪᠠᠶᠢᠯᠭᠠᠬᠤ ᠬᠡᠷᠡᠭᠳᠡᠢ ᠭᠡᠳᠡᠭ᠃ ᠭᠠᠳᠠᠭᠠᠳᠣ ᠶᠢᠨ ᠨᠢᠭᠡ ᠦᠯᠢᠭᠡᠷ ᠤᠨ ᠵᠣᠬᠢᠶᠠᠯᠴᠢ ᠶᠢᠨ ᠦᠵᠡᠬᠦ ᠪᠠᠷ᠄ ︽ᠬᠡᠨ ᠬᠡᠷᠪᠡ ᠰᠢᠨ᠎ᠡ ᠲᠡᠭᠦᠰᠭᠡᠯ ᠢ ᠡᠭᠦᠳᠦᠪᠡᠯ ᠲᠡᠷᠡ ᠮᠠᠨᠢ ᠰᠢᠨ᠎ᠡ ᠡᠷᠢᠨ ᠢ ᠨᠡᠬᠡᠬᠡᠭᠰᠡᠨ ᠶᠠᠪᠣᠳᠠᠯ ᠪᠣᠯᠣᠨ᠎ᠠ︾ ᠭᠡᠰᠡᠨ ᠪᠢᠯᠠ᠃     ᠨᠢᠭᠡ ᠵᠣᠬᠢᠶᠠᠯ ᠨᠢ ᠰᠠᠶᠢᠨ ᠠᠭᠤᠯᠭ᠎ᠠ  ᠪᠠᠶᠢᠬᠤ ᠬᠡᠷᠡᠭᠳᠡᠢ ᠮᠦᠷᠳᠡᠬᠡᠨ ᠪᠠᠰᠠ ᠭᠤᠴᠣ ᠰᠠᠶᠢᠬᠠᠨ ᠬᠡᠯᠪᠡᠷᠢ ᠪᠠᠶᠢᠬᠤ ᠬᠡᠷᠡᠭᠳᠡᠢ᠃ ᠣᠯᠠᠩᠬᠢ ᠰᠢᠯᠢᠳᠡᠭ ᠵᠣᠬᠢᠶᠠᠯᠴᠢ ᠪᠣᠯ ᠴᠦᠮ ᠦᠢᠯᠡ ᠶᠠᠪᠣᠳᠠᠯ ᠢ ᠨᠠᠷᠢᠨ ᠪᠣᠳᠣᠯᠬᠢᠯᠠᠬᠤ᠂ ᠰᠢᠯᠢᠵᠦ ᠰᠢᠯᠭᠠᠷᠠᠭᠤᠯᠬᠤ  ᠪᠠᠷ  ᠲᠠᠮᠵᠢᠭᠤᠯᠵᠣ  ᠠᠮᠢᠳᠣᠷᠠᠯ  ᠲᠣᠮᠳᠠᠬᠢ  ᠨᠢᠭᠤᠭᠳᠠᠮᠠᠯ ᠵᠦᠢᠯᠡᠰ ᠢ ᠢᠯᠡ ᠲᠣᠳᠣ ᠪᠣᠯᠭᠠᠨ᠂ ᠬᠡᠯᠪᠡᠷᠢ ᠠᠴᠠ ᠨᠢ  ᠦᠵᠡᠪᠡᠯ ᠡᠪ ᠡᠩ ᠤᠨ ᠶᠠᠪᠣᠳᠠᠯ ᠢ ᠶᠡᠷᠦ ᠪᠣᠰᠣ ᠶᠢᠨ ᠣᠳᠬ᠎ᠠ ᠴᠢᠨᠠᠷ ᠲᠠᠢ ᠪᠣᠯᠭᠠᠳᠠᠭ ᠶᠣᠮ᠃ ᠵᠣᠬᠢᠶᠠᠯ ᠤᠨ  ᠦᠢᠯᠡ ᠶᠠᠪᠣᠳᠠᠯ ᠤᠨ ᠣᠷᠭᠢᠯ ᠤᠨ ᠬᠡᠰᠡᠭ ᠨᠢ ᠣᠩᠰᠢᠭᠴᠢ ᠶᠢᠨ ᠣᠷᠮ᠎ᠠ ᠪᠠᠬ᠎ᠠ ᠶᠢ ᠬᠠᠮᠤᠭ ᠠᠴᠠ ᠢᠯᠡᠭᠦᠦ ᠬᠦᠳᠡᠯᠭᠡᠵᠦ᠂ ᠣᠩᠰᠢᠭᠴᠢ ᠶᠢᠨ ᠰᠡᠳᠬᠢᠯ ᠢ ᠬᠠᠮᠤᠭ ᠠᠴᠠ ᠶᠡᠭᠡ ᠰᠢᠵᠢᠮᠳᠡᠳᠡᠭ ᠪᠠᠶᠢᠬᠤ ᠳᠠᠭᠠᠨ ᠲᠠᠭᠠᠷᠠᠨ᠎ᠠ᠃     ᠣᠳᠬ᠎ᠠ ᠵᠣᠬᠢᠶᠠᠯ ᠤᠨ ᠲᠦᠷᠢ ᠪᠣᠯ ᠢᠮᠠᠭᠳᠠ ᠪᠣᠳᠠᠳᠠᠢ᠂ ᠬᠡᠪ ᠰᠢᠨᠵᠢᠳᠣ ᠲᠦᠷᠢ ᠨᠢ ᠮᠦᠨ ᠴᠦ ᠪᠣᠳᠠᠳᠠᠢ ᠪᠠᠶᠢᠳᠠᠭ᠂ ᠭᠡᠪᠡᠴᠦ ᠲᠡᠷᠡ ᠨᠢ ︽ᠨᠢᠭᠡ︾᠎ ᠪᠠᠷ ︽ᠠᠷᠪᠠ︾᠎ ᠶᠢ ᠲᠦᠯᠦᠭᠡᠯᠡᠵᠦ ᠪᠠᠶᠢᠳᠠᠭ᠃ ᠬᠡᠪ ᠰᠢᠨᠵᠢᠳᠣ ᠲᠦᠷᠢ ᠨᠢ ᠬᠡᠪ ᠰᠢᠨᠵᠢᠳᠣ ᠣᠷᠴᠢᠨ ᠲᠣᠭᠤᠷᠢᠨ ᠳᠤ ᠯᠡ ᠰᠠᠶ᠋ᠢ ᠦᠨᠳᠦᠰᠦ ᠬᠠᠳᠬᠤᠨ ᠦᠰᠦᠨ ᠪᠤᠶᠢᠵᠢᠳᠠᠭ᠃ ᠵᠠᠷᠢᠮ ᠣᠳᠬ᠎ᠠ ᠠᠴᠠ ᠠᠪᠴᠣ ᠬᠡᠯᠡᠪᠡᠯ ᠬᠡᠪ ᠰᠢᠨᠵᠢᠳᠣ ᠲᠦᠷᠢ ᠨᠢ ᠣᠷᠴᠢᠨ ᠲᠣᠭᠤᠷᠢᠨ ᠤ ᠪᠦᠳᠦᠬᠡᠭᠳᠡᠬᠦᠨ ᠮᠦᠨ᠃ ᠨᠢᠭᠡᠨ ᠣᠷᠠᠯᠢᠭ ᠤᠨ ᠲᠦᠷᠢ ᠶᠢᠨ ᠠᠮᠢᠳᠣ ᠲᠦᠷᠰᠦᠯᠢᠭ ᠪᠠᠶᠢᠬᠤ ᠡᠰᠡᠬᠦ ᠨᠢ ᠨᠡᠯᠢᠶᠡᠳ ᠶᠡᠭᠡ ᠬᠡᠮᠵᠢᠶᠡᠨ ᠳᠤ ᠨᠠᠷᠢᠨ ᠵᠦᠢᠯᠡᠰ ᠲᠤ ᠪᠠᠶᠢᠳᠠᠭ ᠶᠣᠮ᠃ ︽ᠦᠯᠢᠭᠡᠷ ᠤᠨ ᠵᠣᠬᠢᠶᠠᠯ ᠢ ᠪᠦᠳᠦᠭᠡᠬᠦ ᠪᠠᠷ ᠠᠪᠴᠣ ᠬᠡᠯᠡᠪᠡᠯ᠂ ᠨᠠᠷᠢᠨ ᠵᠦᠢᠯᠡᠰ ᠪᠦᠬᠦᠨ ᠨᠢ ᠴᠦᠮ ᠨᠢᠭᠡ ᠮᠦᠬᠦᠯᠢᠭ ᠰᠣᠪᠣᠳ ᠰᠢᠭ᠋ ᠶᠣᠮ᠂ ᠪᠢᠳᠡ ᠲᠡᠭᠦᠨ ᠢ ᠬᠡᠯᠬᠢᠵᠦ ᠨᠡᠶᠢᠯᠡᠭᠦᠯᠪᠡᠯ ᠰᠠᠶ᠋ᠢ ᠨᠢᠭᠡᠨ ᠰᠣᠨᠳᠣᠷ ᠪᠣᠯᠳᠠᠭ᠃ ᠨᠢᠭᠡ ᠦᠭᠦᠯᠡᠯᠭᠡ ᠳᠤ ᠬᠦᠮᠦᠨ ᠤ ᠰᠡᠳᠬᠢᠯ ᠢ ᠬᠦᠳᠡᠯᠭᠡᠮ᠎ᠡ ᠨᠢᠭᠡ ᠨᠠᠷᠢᠨ ᠵᠦᠢᠯᠡᠰ ᠪᠠᠶᠢᠪᠠᠯ ᠡᠨᠡ ᠬᠦ ᠦᠭᠦᠯᠡᠯᠭᠡ ᠶᠢ ᠭᠡᠷᠡᠯ ᠰᠠᠴᠣᠷᠠᠮ᠎ᠠ ᠦᠩᠭᠡ ᠭᠢᠯᠪᠠᠭ᠎ᠠ ᠲᠠᠢ ᠪᠣᠯᠭᠠᠳᠠᠭ︾ ᠭᠡᠰᠡᠨ ᠦᠬᠦᠯᠡᠯ ᠪᠠᠶᠢᠳᠠᠭ᠃     ᠵᠣᠬᠢᠶᠠᠯ ᠪᠦᠳᠦᠭᠡᠯ ᠳᠤ ︽ᠰᠦᠢᠯᠳᠠ︾ ᠬᠢᠬᠦ ᠶᠢ ᠵᠠᠷᠢᠮ ᠬᠦᠮᠦᠨ ︽ᠡᠷᠡᠭᠡᠯᠵᠡᠭᠡ︾ ᠭᠡᠳᠡᠭ᠂ ᠪᠠᠰᠠ ︽ᠲᠡᠩᠰᠡᠯᠭᠡᠯ︾ ᠭᠡᠳᠡᠭ᠃ ᠡᠨᠡ ᠠᠷᠭ᠎ᠠ ᠨᠢ ᠦᠯᠢᠭᠡᠷ ᠤᠨ ᠵᠣᠬᠢᠶᠠᠯ ᠪᠣᠯᠣᠨ ᠺᠢᠨᠣ᠋ ᠵᠦᠴᠦᠭᠡ ᠶᠢᠨ ᠵᠣᠬᠢᠶᠠᠯ ᠳᠤ ᠦᠷᠬᠦᠯᠵᠢ ᠬᠡᠷᠡᠭᠯᠡᠭᠳᠡᠳᠡᠭ᠃ ᠣᠩᠰᠢᠭᠴᠢ ᠶᠢᠨ ᠣᠷᠮ᠎ᠠ ᠪᠠᠬ᠎ᠠ ᠶᠢ ᠲᠠᠳᠠᠨ ᠲᠡᠰᠬᠦ ᠠᠯᠳᠠᠷᠠᠭᠤᠯᠣᠨ ᠲᠡᠩᠰᠡᠯᠭᠡᠵᠦ᠂ ᠣᠷᠠᠯᠢᠭ ᠤᠨ ᠲᠠᠳᠠᠬᠤ ᠬᠦᠴᠦᠨ ᠢ ᠴᠢᠩᠭᠠᠷᠠᠭᠤᠯᠳᠠᠭ ᠠᠷᠭ᠎ᠠ ᠮᠦᠨ᠃ ︽ᠲᠣᠬᠢᠶᠠᠯ︾᠎ ᠢ ᠬᠡᠷᠡᠭᠯᠡᠬᠦ ᠪᠣᠯ ᠵᠣᠬᠢᠶᠠᠯᠴᠢ ᠶᠢᠨ ᠵᠣᠬᠢᠶᠠᠨ ᠪᠦᠳᠦᠭᠡᠬᠦ ᠦᠶ᠎ᠡ ᠶᠢᠨ ᠨᠢᠭᠡ ᠵᠦᠢᠯ ᠤᠨ ᠣᠨᠴᠠᠭᠠᠢ ᠴᠢᠳᠠᠪᠣᠷᠢ ᠮᠦᠨ᠃ ᠶᠡᠷᠦ ᠶᠢᠨ ᠦᠭᠡᠨ ᠳᠤ᠄ ᠦᠨᠡᠨ ᠲᠣᠬᠢᠶᠠᠯ ᠦᠭᠡᠢ ᠪᠣᠯ ᠦᠯᠢᠭᠡᠷ ᠬᠠᠮᠢᠭ᠎ᠠ ᠠᠴᠠ ᠡᠭᠦᠰᠬᠦ ᠪᠣᠢ ᠭᠡᠳᠡᠭ ᠨᠢ ︽ᠲᠣᠬᠢᠶᠠᠯ︾ ᠪᠣᠯ ᠠᠶᠠᠨᠳᠠᠭᠠᠨ ᠤ ᠪᠦᠭᠡᠳ ᠦᠨᠡᠨ ᠮᠦᠨ ᠲᠦᠷᠦᠭᠳᠡᠯ ᠣᠯᠭᠤᠳᠠᠭ ᠪᠣᠯᠬᠤᠷ ᠵᠦᠷᠢᠴᠡᠯ ᠮᠦᠷᠭᠦᠯᠳᠦᠭᠡᠨ ᠢ ᠰᠢᠢᠳᠪᠦᠷᠢᠯᠡᠬᠦ ᠰᠠᠶᠢᠨ ᠠᠷᠭ᠎ᠠ ᠮᠦᠨ᠃ ᠣᠳᠬ᠎ᠠ ᠵᠣᠬᠢᠶᠠᠯ ᠤᠨ ︽ᠪᠡᠯᠭᠡᠳᠡᠯ︾᠎ ᠤᠨ ᠠᠷᠭ᠎ᠠ ᠶᠢ ᠬᠡᠷᠡᠭᠯᠡᠪᠡᠯ ᠵᠣᠬᠢᠶᠠᠯ ᠢ ᠲᠠᠯᠳᠠ ᠪᠢᠳᠡᠭᠦᠦ ᠣᠳᠬ᠎ᠠ ᠲᠠᠢ ᠪᠣᠯᠭᠠᠳᠠᠭ᠃ ᠪᠡᠯᠭᠡᠳᠡᠯ ᠤᠨ ᠲᠣᠣᠷ᠎ᠠ ᠶᠦᠬᠡᠳᠡᠯ ᠬᠢᠭᠡᠳ ᠵᠣᠷᠢᠭᠳᠠᠢ ᠬᠡᠯᠡᠬᠦ ᠦᠭᠡ ᠪᠠᠨ ᠣᠷᠠᠯᠢᠭ ᠢᠶᠠᠷ ᠲᠠᠯᠳᠠᠯᠠᠵᠣ ᠪᠣᠯᠳᠠᠭ᠂ ᠪᠡᠯᠭᠡᠳᠡᠯ ᠤᠨ ᠲᠣᠳᠣᠷ᠎ᠠ ᠮᠠᠰᠢ ᠶᠡᠭᠡ ᠦᠵᠡᠯ ᠰᠠᠨᠠᠭᠠᠨ ᠤ ᠠᠭᠤᠯᠭ᠎ᠠ ᠶᠢ ᠰᠢᠩᠭᠡᠭᠡᠨ ᠣᠷᠣᠭᠤᠯᠵᠣ ᠪᠣᠯᠳᠠᠭ ᠶᠣᠮ᠃ ︽ᠰᠡᠮ ᠲᠣᠬᠢᠯᠳᠠ︾᠎ ᠪᠠᠷ ᠠᠯᠢᠪᠠ ︽ᠡ ︾᠎ ᠪᠠᠷ ︽ᠠ︾᠎ ᠶᠢ ᠦᠵᠡᠭᠦᠯᠬᠦ ᠠᠷᠭ᠎ᠠ ᠶᠢ ᠬᠡᠷᠡᠭᠯᠡᠵᠣ ᠪᠣᠯᠳᠠᠭ᠃     ᠪᠣᠷᠣ ᠲᠦᠷᠰᠦᠯᠡᠯ ᠪᠣᠯ ᠲᠣᠪᠴᠢ ᠪᠣᠷᠣᠭᠵᠢᠭᠤᠨ ᠪᠠᠶᠢᠬᠤ ᠶᠢ ᠡᠷᠬᠢᠮᠯᠡᠨ᠎ᠡ᠂ ᠨᠠᠷᠢᠨ ᠵᠢᠷᠣᠭᠯᠠᠯ ᠪᠣᠯ ᠣᠯᠠᠨ ᠵᠦᠢᠯ ᠤᠨ ᠢᠯᠡᠳᠬᠡᠬᠦ ᠠᠷᠭ᠎ᠠ ᠶᠢ ᠶᠡᠷᠦᠩᠬᠡᠶᠢᠯᠡᠨ ᠬᠡᠷᠡᠭᠯᠡᠵᠦ ᠦᠩᠭᠡ ᠲᠦᠷᠰᠦ ᠶᠢ ᠨᠠᠷᠢᠨ ᠭᠠᠷᠭᠠᠳᠠᠭ᠃ ᠯᠦ ᠰᠢᠶᠦ᠋ᠨ ᠪᠣᠯ ᠪᠣᠷᠣ ᠲᠦᠷᠰᠦᠯᠡᠯ ᠤᠨ ᠠᠷᠭ᠎ᠠ ᠶᠢ ᠬᠡᠷᠡᠭᠯᠡᠳᠡᠭ ᠲᠠᠷᠬᠠᠨ ᠶᠣᠮ᠃ ᠲᠡᠷᠡ᠂ ᠪᠣᠷᠣ ᠲᠦᠷᠰᠦᠯᠡᠯ ᠤᠨ ᠮᠦᠨ ᠴᠢᠨᠠᠷ ᠢ ︽ᠦᠨᠡᠨ ᠰᠠᠨᠠᠭ᠎ᠠ ᠠᠬᠤᠢ ᠲᠠᠢ᠂ ᠶᠠᠩᠵᠣᠯᠠᠵᠣ ᠴᠢᠮᠡᠬᠦ ᠦᠭᠡᠢ᠂ ᠮᠠᠶ᠋ᠢᠡᠡᠯᠠᠬᠤ ᠦᠭᠡᠢ᠂ ᠭᠠᠶᠢᠬᠠᠭᠤᠯᠬᠤ ᠦᠭᠡᠢ︾ ᠭᠡᠵᠦ ᠬᠤᠷᠢᠶᠠᠩᠭᠤᠶᠢᠯᠠᠵᠠᠢ᠃ ᠪᠣᠷᠣ ᠲᠦᠷᠰᠦᠯᠡᠯ ᠬᠢᠭᠡᠳ ᠨᠠᠷᠢᠨ ᠵᠢᠷᠣᠭᠯᠠᠯ ᠨᠢ ᠦᠪᠡᠷ ᠦᠪᠡᠷ ᠤᠨ ᠬᠢᠨᠢ ᠣᠨᠴᠠᠯᠢᠭ᠂ ᠲᠠᠪᠠᠭᠤᠯᠢᠭ ᠲᠠᠯ᠎ᠠ ᠲᠠᠢ ᠪᠣᠯᠬᠤᠷ ᠶᠡᠷᠦ ᠳᠡᠭᠡᠨ ᠵᠣᠬᠢᠶᠠᠭᠴᠢᠳ ᠣᠶᠠᠯᠳᠣᠭᠤᠯᠣᠨ ᠬᠡᠷᠡᠭᠯᠡᠳᠡᠭ ᠪᠢᠯᠠ᠃     ᠣᠷᠠᠨ ᠵᠣᠬᠢᠶᠠᠯ ᠪᠣᠯ ᠲᠦᠷᠰᠦᠯᠢᠭ ᠲᠣᠰᠬᠠᠯ᠂ ᠬᠡᠯᠡᠨ ᠤ ᠣᠷᠠᠯᠢᠭ ᠮᠦᠨ᠃ ᠲᠡᠷᠡ ᠨᠢ ᠮᠠᠰᠢ ᠡᠪᠯᠢᠭ ᠲᠣᠬᠢᠯᠢᠭ ᠲᠣᠬᠢᠷᠠᠭᠤᠯᠣᠭᠰᠠᠨ ᠨᠢᠭᠡ ᠬᠡᠯᠬᠢᠶ᠎ᠡ ᠬᠡᠯᠡ ᠬᠡᠯᠡᠯᠭᠡ ᠮᠦᠨ᠃ ᠣᠳᠬ᠎ᠠ ᠵᠣᠬᠢᠶᠠᠯ ᠤᠨ ᠬᠡᠯᠡ ᠨᠢ ᠣᠶᠠᠩᠭᠠᠯᠢᠭ᠂ ᠲᠦᠷᠰᠦᠯᠢᠭ᠂ ᠣᠨᠣᠪᠴᠢᠳᠠᠢ᠂ ᠲᠣᠪᠴᠢ ᠲᠣᠳᠣᠷᠠᠭᠤᠨ᠂ ᠰᠢᠨ᠎ᠡ ᠰᠣᠷᠭᠤᠭ ᠪᠠᠶᠢᠬᠤ ᠬᠡᠷᠡᠭᠳᠡᠢ᠃ ᠭᠤᠷᠺᠢ ᠵᠣᠬᠢᠶᠠᠨ ᠪᠦᠳᠦᠭᠡᠭᠰᠡᠨ ᠲᠣᠷᠰᠢᠯᠭ᠎ᠠ ᠪᠠᠨ ᠳ᠋ᠦᠩᠨᠡᠭᠰᠡᠨ ᠨᠢᠭᠡ ᠵᠣᠬᠢᠶᠠᠯ ᠳᠠᠭᠠᠨ ᠣᠷᠣᠰ ᠤᠨ ᠨᠢᠭᠡᠨ ᠰᠢᠯᠦᠭᠴᠢᠨ ᠤ᠄ ︽ᠲᠡᠯᠡᠬᠡᠢ ᠲᠡᠭᠡᠷ᠎ᠡ ᠬᠡᠯᠡᠨ ᠤ ᠭᠠᠴᠢᠭᠳᠠᠯ ᠠᠴᠠ ᠦᠭᠡᠷ᠎ᠡ ᠨᠡᠩ ᠬᠡᠴᠡᠭᠦᠦ ᠭᠠᠴᠢᠭᠳᠠᠯ ᠠᠯᠠᠭ᠎ᠠ︾ ᠭᠡᠵᠣ ᠬᠡᠯᠡᠭᠰᠡᠨ ᠦᠭᠡ ᠪᠠᠷ ᠡᠰᠢ ᠲᠠᠳᠠᠭᠰᠠᠨ ᠪᠢᠯᠠ᠃     ᠦᠪᠡᠷᠮᠢᠴᠡ ᠡᠭᠦᠳᠦᠯᠳᠡ ᠲᠠᠢ ᠪᠠᠶᠢᠬᠤ ᠪᠣᠯ ᠣᠷᠠᠨ ᠵᠣᠬᠢᠶᠠᠯ ᠤᠨ ᠣᠷᠠᠯᠢᠭᠴᠢ ᠴᠢᠨᠠᠷ ᠤᠨ ᠴᠢᠬᠤᠯᠠ ᠪᠡᠯᠭᠡ ᠲᠡᠮᠳᠡᠭ ᠮᠦᠨ᠃ ᠣᠳᠬ᠎ᠠ ᠣᠷᠠᠯᠢᠭ ᠤᠨ ᠨᠣᠳᠤᠭ ᠲᠡᠪᠢᠰᠭᠡᠷ ᠢ ᠨᠡᠬᠡᠬᠡᠵᠦ ᠦᠷᠭᠡᠳᠬᠡᠬᠦ ᠨᠢ ᠣᠷᠠᠨ ᠵᠣᠬᠢᠶᠠᠯᠴᠢᠳ ᠤᠨ ᠣᠶᠣᠨ ᠰᠠᠨᠠᠭᠠᠨ ᠤ ᠨᠢᠭᠡ ᠵᠦᠢᠯ ᠤᠨ ᠵᠣᠷᠢᠭᠳᠠᠢ ᠡᠭᠦᠳᠦᠯᠳᠡ ᠶᠣᠮ᠃ ᠵᠣᠬᠢᠶᠠᠨ ᠪᠦᠳᠦᠭᠡᠬᠦ ᠲᠠᠯ᠎ᠠ ᠪᠠᠷ ᠬᠢ ᠪᠣᠰᠣᠳ ᠠᠴᠠ ᠢᠯᠭᠠᠭᠳᠠᠬᠤ ᠦᠪᠡᠷᠮᠢᠴᠡ ᠰᠢᠨᠵᠢ ᠲᠡᠮᠳᠡᠭ ᠪᠣᠯᠬᠤ ︽ᠪᠢ︾᠎ ᠶᠢ ᠬᠡᠳᠦᠢ ᠶᠡᠭᠡ ᠢᠯᠡᠷᠡᠭᠦᠯᠵᠦ ᠴᠢᠳᠠᠵᠦ ᠪᠠᠶᠢᠪᠠᠯ᠂ ᠵᠣᠬᠢᠶᠠᠭᠴᠢ ᠶᠢᠨ ᠬᠡᠪ ᠨᠠᠮᠪᠠ ᠮᠦᠨ ᠲᠡᠳᠦᠢ ᠢᠯᠡ ᠲᠣᠳᠣ ᠪᠣᠯᠵᠣ᠂ ᠣᠳᠬ᠎ᠠ ᠣᠷᠠᠯᠢᠭ ᠤᠨ ᠦᠨᠢᠷ ᠴᠡᠴᠡᠭ ᠤᠨ ᠬᠦᠷᠢᠶᠡᠯᠡᠩ ᠳᠤ ᠦᠩᠭᠡ ᠶᠢᠨ ᠴᠡᠴᠡᠭ ᠮᠢᠷᠠᠯᠵᠠᠨ ᠲᠡᠯᠭᠡᠷᠡᠭᠰᠡᠨ ᠦᠷᠨᠢᠨ ᠬᠦᠭᠵᠢᠭᠰᠡᠨ ᠦᠵᠡᠮᠵᠢ ᠲᠣᠳᠣᠷᠠᠬᠤ ᠶᠣᠮ᠃     ᠬᠦᠮᠦᠨ ᠤ ᠡᠷᠬᠢᠮ ᠢᠨᠣ ᠠᠰ ᠰᠢᠯᠣᠭᠤᠨ ᠳᠤᠷ ᠪᠣᠢ᠂ ᠰᠢᠯᠦᠭ ᠵᠣᠬᠢᠶᠠᠯ ᠤᠨ ᠡᠷᠬᠢᠮ ᠢᠨᠣ ᠨᠣᠭᠤᠯᠤᠭ᠎ᠠ ᠡᠷᠭᠢᠯᠭᠡ ᠳᠤᠷ ᠪᠣᠢ᠃ ᠣᠷᠠᠨ ᠵᠣᠬᠢᠶᠠᠯ ᠨᠢ ︽ᠲᠣᠯᠢᠨ ᠤ ᠲᠣᠳᠣᠷᠠᠬᠢ ᠰᠠᠷᠠ᠂ ᠮᠠᠨᠠᠨ ᠤ ᠲᠣᠮᠳᠠᠬᠢ ᠴᠡᠴᠡᠭ︾ ᠰᠢᠭ ᠪᠦᠳᠡᠬᠢ ᠭᠤᠸ᠎ᠠ ᠰᠠᠶᠢᠬᠠᠨ ᠢ ᠢᠯᠡᠷᠡᠭᠦᠯᠪᠡᠯ ᠲᠦᠮᠡᠨ ᠴᠡᠴᠡᠭ ᠤᠨ ᠬᠦᠷᠢᠶᠡᠯᠡᠩ ᠳᠤ ᠦᠩᠭᠡ ᠢᠯᠭᠠᠷᠠᠨ ᠮᠢᠷᠠᠯᠵᠠᠬᠤ ᠶᠣᠮ᠃     ᠬᠤᠶᠡᠷ     ᠵᠣᠬᠢᠶᠠᠨ ᠪᠦᠳᠦᠭᠡᠬᠦ ᠪᠣᠯ ᠨᠢᠭᠡᠨ ᠬᠠᠳᠠᠭᠤ ᠪᠡᠷᠬᠡᠰᠢᠶᠡᠯᠳᠡᠢ᠂ ᠬᠢᠨᠠᠮᠠᠭᠠᠢ ᠴᠢᠩᠭ᠎ᠠ᠂ ᠦᠢᠯᠡ ᠬᠠᠯᠠ ᠲᠠᠢ ᠣᠷᠳᠣ ᠣᠳᠠᠭᠠᠨ ᠲᠠᠶᠢᠨ ᠮᠦᠨ᠃     ᠣᠷᠣᠰ ᠤᠨ ᠠᠬᠤᠶᠢᠴᠢ ᠦᠵᠡᠯ ᠤᠨ ᠠᠭᠤᠣ ᠶᠡᠭᠡ ᠵᠣᠬᠢᠶᠠᠯᠴᠢ ᠲᠣᠯᠰᠲ᠋ᠣᠢ ᠵᠠᠭᠤ ᠭᠠᠷᠣᠢ ᠲᠦᠮᠡᠨ ᠦᠭᠡ ᠲᠠᠢ ᠠᠪᠣᠷᠭᠤ ᠪᠦᠳᠦᠭᠡᠯ ︽ᠲᠠᠶᠢᠨ ᠪᠠ ᠡᠩᠬᠡ︾᠎ ᠪᠠᠨ ᠨᠠᠢᠮᠠᠨᠳᠠ ᠪᠢᠴᠢᠪᠡ᠂ ᠵᠦᠪᠬᠡᠨ ᠡᠬᠢᠯᠡᠯᠳᠡ ᠪᠠᠨ ᠠᠷᠪᠠᠨ ᠲᠠᠪᠤ ᠣᠳᠠᠭ᠎ᠠ ᠵᠠᠰᠠᠯ᠎ᠠ ᠭᠡᠳᠡᠭ᠃ ᠲᠡᠭᠦᠨ ᠤ ᠨᠢᠭᠡ ᠵᠣᠬᠢᠶᠠᠯ ᠨᠢ ᠦᠨᠡᠨ ᠳᠡᠭᠡᠨ ᠲᠠᠪᠣᠬᠠᠨ ᠨᠢᠭᠤᠷ ᠢᠶᠠᠷ ᠲᠣᠭᠳᠠᠪᠠ᠂ ᠭᠡᠳᠡᠯ᠎ᠡ ᠨᠣᠣᠷᠠᠭᠯᠠᠭᠰᠠᠨ ᠡᠬᠡ ᠪᠢᠴᠢᠭ ᠨᠢ ᠨᠠᠢᠮᠠᠨ ᠵᠠᠭᠤᠨ ᠨᠢᠭᠤᠷ ᠲᠤ ᠬᠦᠷᠦᠭᠰᠡᠨ ᠶᠣᠮ᠃ ᠲᠡᠷᠡ ᠵᠣᠬᠢᠶᠠᠨ ᠪᠢᠴᠢᠬᠦ ᠪᠦᠷᠢ ᠳᠤ ᠦᠢᠯᠡ ᠪᠠᠨ ᠦᠵᠡᠵᠦ᠂ ᠦᠰᠦ ᠪᠠᠨ ᠲᠣᠭᠠᠯᠠᠳᠠᠭ ᠪᠠᠶᠢᠭᠰᠠᠨ᠃     ᠨᠣᠹᠧᠯ ᠤᠨ ᠱᠠᠩᠨᠠᠯ ᠢ ᠬᠦᠷᠳᠡᠭᠰᠡᠨ ᠠᠮᠧᠷᠢᠺᠡ ᠶᠢᠨ ᠵᠣᠬᠢᠶᠠᠯᠴᠢ ᠾᠧᠮᠢᠩᠸᠧᠢ ᠶᠢᠨ ᠲᠣᠭᠤᠵᠢ ︽ᠡᠪᠦᠭᠡᠨ ᠬᠢᠭᠡᠳ ᠲᠠᠯᠠᠢ︾᠎ ᠪᠠᠨ ᠬᠤᠶᠠᠷ ᠵᠠᠭᠤᠭᠠᠳ ᠣᠳᠠᠭ᠎ᠠ ᠵᠠᠰᠠᠵᠠᠢ ᠭᠡᠳᠡᠭ᠃ ᠲᠡᠷᠡ᠂ ᠵᠣᠬᠢᠶᠠᠯ ᠤᠨ ᠲᠣᠳᠣᠷᠠᠬᠢ ᠬᠡᠷᠡᠭ ᠦᠭᠡᠢ ᠭᠡᠵᠦ ᠪᠣᠳᠣᠭᠳᠠᠭᠰᠠᠨ ᠦᠭᠡ ᠦᠭᠦᠯᠡᠪᠦᠷᠢ ᠪᠠᠨ ᠬᠠᠶᠢᠷ᠎ᠠ ᠨᠠᠶᠢᠷ ᠦᠭᠡᠢ ᠬᠠᠰᠣᠵᠦ ᠯᠡ ᠪᠠᠶᠢᠳᠠᠭ᠃ ᠢᠩᠭᠢᠬᠦ ᠳᠡᠭᠡᠨ ᠬᠦᠮᠦᠰ ᠲᠡᠭᠦᠨ ᠢ ︽ᠰᠦᠬᠡ ᠪᠠᠷᠢᠭᠰᠠᠨ ᠵᠣᠬᠢᠶᠠᠯᠴᠢ︾ ᠭᠡᠯᠴᠡᠳᠡᠭ᠃     ᠮᠠᠨ ᠤ ᠣᠯᠣᠰ ᠤᠨ ᠵᠣᠬᠢᠶᠠᠭᠴᠢ ᠳ᠋ᠦ᠋ ᠫᠧᠩ ᠴᠧᠩ ᠭᠤᠴᠢ ᠭᠠᠷᠣᠢ ᠲᠦᠮᠡᠨ ᠦᠭᠡ ᠲᠠᠢ    ︽ᠶᠠᠨ ᠠᠨ ᠤ ᠬᠠᠮᠠᠭᠠᠯᠠᠯᠳᠠ︾ ᠭᠡᠬᠦ ᠷᠣᠮᠠᠨ ᠢᠶᠠᠨ ᠪᠢᠴᠢᠬᠦ ᠳᠤ ᠨᠢᠭᠡ ᠮᠣᠷᠢᠨ ᠲᠡᠷᠭᠡ ᠴᠠᠭᠠᠰᠣ ᠬᠡᠷᠡᠭᠯᠡᠭᠰᠡᠨ ᠭᠡᠳᠡᠭ ᠢ ᠬᠡᠯᠡᠬᠦ ᠳᠤ ᠬᠦᠮᠦᠰ ᠢᠳᠡᠭᠡᠬᠦᠶ᠎ᠡ ᠪᠡᠷᠬᠡ ᠶᠣᠮ᠃     ᠬᠡᠯᠡ ᠶᠢ ᠣᠳᠬ᠎ᠠ ᠵᠣᠬᠢᠶᠠᠯ  ᠤᠨ ᠲᠡᠷᠢᠭᠦᠨ ᠴᠢᠬᠤᠯᠠ ᠠᠨᠢᠰᠣ ᠪᠠᠷ ᠦᠵᠡᠳᠡᠭ ᠵᠦᠪᠯᠡᠯᠳᠣ ᠶᠢᠨ ᠠᠪᠣᠷᠭᠤ ᠵᠣᠬᠢᠶᠠᠯᠴᠢ ᠭᠤᠷᠺᠢ ᠨᠢᠭᠡᠨ ᠣᠳᠠᠭ᠎ᠠ ᠵᠣᠬᠢᠶᠠᠯ ᠢᠶᠠᠨ ᠨᠢᠭᠡᠨᠳᠡ ᠪᠢᠴᠢᠭᠡᠳ ᠪᠠᠷᠠᠴᠢᠬᠠᠭᠰᠠᠨ ᠪᠣᠯᠪᠠᠴᠣ ᠲᠣᠰᠢᠶᠠᠬᠤ ᠦᠭᠡᠢ ᠪᠠᠶᠢᠪᠠ᠃ ᠨᠠᠶᠢᠷᠠᠭᠤᠯᠣᠭᠴᠢ ᠠᠴᠠ ᠭᠤᠷᠺᠢ ᠳᠤ ᠡᠬᠡ ᠪᠢᠴᠢᠭ ᠢᠶᠠᠨ ᠲᠣᠰᠢᠶᠠᠭᠠᠷᠠᠢ ᠭᠡᠵᠦ ᠱᠠᠭᠠᠷᠳᠠᠪᠠ᠃ ᠭᠡᠳᠡᠯ᠎ᠡ ᠭᠤᠷᠺᠢ ᠵᠣᠬᠢᠶᠠᠯ ᠤᠨ ᠢᠶᠠᠨ ᠲᠣᠳᠣᠷ᠎ᠠ ᠨᠢᠭᠡ ᠦᠭᠡ ᠶᠢ ᠬᠡᠷᠡᠭᠯᠡᠭᠰᠡᠨ ᠨᠢ ᠣᠨᠣᠪᠴᠢ ᠦᠭᠡᠢ ᠪᠠᠶᠢᠨ᠎ᠠ ᠭᠡᠵᠦ ᠪᠣᠳᠣᠭᠰᠠᠨ ᠲᠣᠯᠠ ᠡᠬᠡ ᠪᠢᠴᠢᠭ ᠢᠶᠠᠨ ᠦᠭᠬᠦ ᠦᠭᠡᠢ ᠬᠤᠶᠢᠰᠢᠯᠠᠭᠤᠯᠣᠭᠠᠳ ᠪᠠᠶᠢᠵᠠᠢ᠃ ᠨᠢᠭᠡ ᠡᠳᠦᠷ ᠲᠡᠷᠡ ᠮᠣᠷᠢᠨ ᠲᠣᠭᠯᠠᠭᠠᠮ ᠦᠵᠡᠬᠦ ᠪᠠᠷ ᠣᠴᠢᠭᠠᠳ ᠲᠣᠭᠯᠠᠭᠠᠮ ᠤᠨ ᠢᠳᠡᠨ ᠲᠡᠭᠡᠷ᠎ᠡ ᠨᠢ ᠬᠦᠷᠬᠦ ᠦᠶ᠎ᠡ ᠳᠤ ᠭᠡᠨᠡᠳᠳᠡ ᠨᠢᠭᠡ ᠬᠠᠪᠣᠯᠢᠭ ᠦᠭᠡ ᠰᠡᠷᠡᠭᠳᠡᠪᠡ᠃ ᠲᠡᠷᠡ ᠪᠠᠷᠢᠨ ᠲᠣᠣᠷ᠎ᠠ ᠪᠠᠨ ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ ᠠᠷᠠᠢ ᠭᠡᠵᠦ ᠣᠯᠣᠭᠰᠠᠨ ᠲᠡᠷᠡ ᠨᠢᠭᠡ ᠦᠭᠡ ᠪᠠᠨ ᠲᠡᠮᠳᠡᠭᠯᠡᠵᠦ ᠠᠪᠣᠭᠰᠠᠨ ᠪᠢᠯᠠ᠃     1852 ᠣᠨ ᠤ ᠬᠤᠶᠠᠷ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠬᠤᠶᠠᠷ ᠤᠨ ᠦᠷᠯᠦᠭᠡ᠂ ᠣᠷᠣᠰ ᠤᠨ ᠣᠳᠬ᠎ᠠ ᠵᠣᠬᠢᠶᠠᠯ ᠤᠨ ᠲᠡᠦᠬᠡᠨ ᠳᠤ ᠬᠦᠮᠦᠰ ᠢ ᠭᠦᠨ ᠪᠣᠳᠣᠯᠭᠠᠰᠢᠷᠠᠭᠤᠯᠣᠮ᠎ᠠ ᠨᠢᠭᠡᠨ ᠭᠤᠨᠢᠭᠳᠣ ᠶᠠᠪᠣᠳᠠᠯ ᠭᠠᠷᠴᠠᠢ᠃ ᠨᠢᠭᠡᠨ ᠵᠣᠬᠢᠶᠠᠯᠴᠢ ᠦᠪᠡᠷ ᠤᠨ ᠠᠷᠪᠠᠨ ᠵᠢᠯ ᠤᠨ ᠲᠣᠷᠰᠢ ᠵᠣᠪᠠᠨ ᠵᠦᠳᠡᠨ ᠪᠠᠶᠢᠵᠦ ᠪᠦᠳᠦᠭᠡᠭᠰᠡᠨ ᠪᠦᠳᠦᠭᠡᠯ ᠢᠶᠠᠨ ᠬᠠᠷᠠᠵᠦ ᠪᠠᠶᠢᠭᠠᠳ ᠦᠨᠡᠰᠦᠨ ᠲᠣᠪᠷᠠᠭ ᠪᠣᠯᠳᠠᠯ᠎ᠠ ᠰᠢᠳᠠᠭᠠᠵᠠᠢ᠃ ᠭᠠᠯᠳᠠᠵᠦ ᠪᠠᠷᠠᠭᠠᠳ ᠲᠡᠷᠡ ᠱᠠᠹᠠ ᠶᠢᠨ ᠲᠡᠭᠡᠷ᠎ᠡ ᠪᠠᠨ ᠬᠡᠪᠳᠡᠭᠡᠳ ᠡᠬᠡᠷ ᠲᠠᠳᠠᠨ ᠣᠬᠢᠯᠠᠯ᠎ᠠ᠃ ᠲᠡᠷᠡ᠄ ︽ᠪᠢ ᠨᠢᠭᠡᠨᠳᠡ ᠵᠣᠪᠠᠯᠠᠩ ᠤᠨ ᠲᠦᠢᠯ ᠳᠤ ᠬᠦᠷᠴᠡᠢ︕︾ ᠭᠡᠵᠦ ᠬᠠᠰᠬᠢᠷᠴᠦ ᠪᠠᠶᠢᠪᠠ᠃ ᠡᠨᠡ ᠵᠣᠬᠢᠶᠠᠯᠴᠢ ᠪᠣᠯ ᠭᠤᠭᠤᠯ ᠮᠦᠨ᠃ ᠲᠡᠭᠦᠨ ᠤ ᠰᠢᠳᠠᠭᠠᠭᠰᠠᠨ ᠨᠢ ︽ᠠᠮᠢ ᠦᠭᠡᠢ ᠠᠯᠪᠠᠳᠣ ᠨᠠᠷ︾᠎ ᠤᠨ ᠬᠤᠶᠠᠳᠣᠭᠠᠷ ᠪᠣᠳᠢ ᠶᠢᠨ ᠬᠢᠨᠢ ᠡᠬᠡ ᠨᠣᠣᠷᠠᠭ ᠪᠣᠯᠣᠨ᠎ᠠ᠃ ︽ᠠᠮᠢ ᠦᠭᠡᠢ ᠠᠯᠪᠠᠳᠣ ᠨᠠᠷ︾᠎ ᠤᠨ ᠠᠩᠬᠠᠳᠣᠭᠠᠷ ᠪᠣᠳᠢ ᠬᠡᠪᠯᠡᠭᠳᠡᠮᠡᠭᠴᠡ ᠪᠦᠬᠦ ᠣᠷᠣᠰ ᠢ ᠲᠣᠩᠰᠣᠯᠭᠠᠭᠰᠠᠨ ᠶᠣᠮ᠃ ᠭᠡᠳᠡᠯ᠎ᠡ ᠬᠤᠵᠢᠮ ᠨᠢ ᠭᠤᠭᠤᠯ ᠤᠨ ᠶᠢᠷᠳᠢᠨᠴᠦ ᠶᠢᠨ ᠦᠵᠡᠯᠳᠡ ᠳᠤ ᠨᠢ ᠬᠤᠪᠢᠷᠠᠯᠳᠠ ᠭᠠᠷᠴᠣ ᠭᠠᠵᠠᠷ ᠤᠨ ᠡᠵᠡᠨ ᠤ ᠬᠠᠷᠠᠴᠠ ᠪᠠᠷ ᠠᠮᠢᠳᠣᠷᠠᠯ ᠢ ᠦᠵᠡᠬᠦ ᠦᠶᠡᠰ ᠲᠤ᠂ ᠭᠠᠵᠠᠷ ᠤᠨ ᠡᠵᠡᠨ ᠢ ᠴᠢᠳᠠᠨ ᠶᠠᠳᠠᠨ ᠦᠩᠭᠡᠯᠡᠨ ᠭᠤᠶᠣᠯᠠᠭᠰᠠᠨ ︽ᠠᠮᠢ ᠦᠭᠡᠢ ᠠᠯᠪᠠᠳᠣ ᠨᠠᠷ︾᠎ ᠤᠨ ᠢᠶᠠᠨ ᠬᠤᠶᠠᠳᠣᠭᠠᠷ ᠪᠣᠳᠢ ᠶᠢ ᠪᠢᠴᠢᠭᠰᠡᠨ ᠪᠠᠶᠢᠳᠠᠭ᠃ ᠡᠨᠡ ᠨᠢ ᠪᠣᠳᠠᠳᠣ ᠠᠮᠢᠳᠣᠷᠠᠯ ᠲᠠᠢ ᠨᠡᠶᠢᠴᠡᠬᠦ ᠦᠭᠡᠢ ᠬᠤᠳᠠᠯ ᠬᠠᠭᠤᠷᠮᠠᠭ ᠵᠦᠢᠯ ᠪᠣᠯᠬᠤ ᠶᠣᠮ᠃ ᠢᠩᠭᠢᠬᠦᠯᠡᠷ ᠲᠡᠷᠡ ᠭᠦᠨ ᠵᠦᠷᠢᠴᠡᠯ ᠵᠣᠪᠠᠨᠢᠯ ᠳᠤ ᠣᠨᠠᠵᠣ᠂ ᠰᠡᠭᠦᠯ ᠳᠤ ᠨᠢ ᠡᠨᠡ ᠪᠦᠳᠦᠭᠡᠯ ᠢᠶᠠᠨ ᠭᠠᠯᠳᠠᠬᠤ ᠯᠡ ᠬᠡᠷᠡᠭ ᠪᠣᠯᠵᠠᠢ᠃     ᠪᠠᠭᠠᠳᠣᠷᠯᠢᠭ ᠢᠶᠠᠷ ᠵᠣᠣᠬᠠᠨ ᠳᠤ ᠬᠢᠭᠰᠡᠨ ᠡᠬᠡ ᠪᠢᠴᠢᠭ ᠤᠨ ᠲᠦᠯᠦ ᠢᠯᠡᠭᠦᠦ ᠨᠢᠭᠡᠨ ᠵᠣᠬᠢᠶᠠᠯᠴᠢ ᠶᠢ ᠭᠡᠷᠡᠯᠳᠦᠭᠦᠯᠵᠦ ᠴᠢᠳᠠᠬᠤ ᠶᠣᠮ᠃ ᠭᠤᠭᠤᠯ ᠪᠣᠯ ᠡᠶᠢᠮᠣ ᠨᠢᠭᠡ ᠡᠷᠬᠢᠮ ᠨᠠᠨᠳᠢᠨ ᠲᠦᠯᠦ ᠳᠤ ᠭᠡᠷᠡᠯᠳᠦᠭᠦᠯᠦᠭᠰᠡᠨ ᠵᠣᠬᠢᠶᠠᠯᠴᠢ ᠪᠣᠯᠬᠤ ᠶᠣᠮ᠃     ︽ᠨᠢᠭᠡ ᠬᠦᠮᠦᠨ ᠣᠷᠠᠯᠢᠭᠴᠢᠨ ᠪᠣᠯᠬᠤ ᠪᠠᠷ ᠪᠡᠶ᠎ᠡ ᠪᠠᠨ ᠵᠣᠷᠢᠭᠤᠯᠣᠭᠰᠠᠨ ᠪᠣᠯ ᠲᠡᠷᠡ ᠲᠠᠷᠣᠢ ᠪᠣᠰᠣᠳ ᠬᠦᠮᠦᠨ ᠲᠠᠢ ᠠᠳᠠᠯᠢ ᠠᠮᠢᠳᠣᠷᠠᠬᠤ ᠶᠢᠨ ᠡᠷᠬᠡ ᠦᠭᠡᠢ ᠪᠣᠯᠬᠤ ᠶᠣᠮ︾᠃ ᠡᠨᠡ ᠪᠣᠯ ᠹᠯᠦ᠋ᠪᠧᠷᠲ ᠠᠴᠠ ᠲᠡᠭᠦᠨ ᠤ ᠰᠣᠷᠣᠭᠴᠢ ᠮᠠᠣᠫᠠᠰᠰᠠᠨ ᠳᠤ ᠬᠡᠯᠡᠭᠰᠡᠨ ᠰᠣᠷᠭᠠᠯ ᠦᠭᠡ᠃ ᠹᠷᠠᠨᠼᠢ ᠶᠢᠨ ᠰᠢᠭᠦᠮᠵᠢᠯᠡᠯᠳᠣ ᠠᠬᠤᠶᠢᠴᠢ ᠦᠵᠡᠯ ᠤᠨ ᠵᠣᠬᠢᠶᠠᠯᠴᠢ ᠮᠠᠣᠫᠠᠰᠰᠠᠨ ᠵᠠᠯᠠᠭᠤ ᠳᠠᠭᠠᠨ ᠹᠯᠦ᠋ᠪᠧᠷᠲ ᠢ ᠪᠠᠭᠰᠢ ᠪᠠᠷᠢᠵᠣ ᠲᠡᠭᠦᠨ ᠤ ᠵᠢᠯᠣᠭᠤᠳᠣᠯᠭ᠎ᠠ ᠲᠣᠣᠷ᠎ᠠ ᠲᠣᠯᠣᠭᠠᠨ ᠵᠢᠯ ᠵᠣᠬᠢᠶᠠᠨ ᠪᠢᠴᠢᠵᠣ ᠪᠣᠯᠪᠠᠰᠣᠷᠠᠵᠠᠢ᠃ ᠲᠣᠯᠣᠭᠠᠨ ᠵᠢᠯ ᠤᠨ ᠲᠣᠷᠰᠢ ᠮᠠᠣᠫᠠᠰᠰᠠᠨ ᠤ ᠪᠣᠯᠪᠠᠰᠣᠷᠠᠵᠦ ᠪᠢᠴᠢᠭᠰᠡᠨ ᠵᠣᠬᠢᠶᠠᠯ ᠨᠢ ᠹᠯᠦ᠋ᠪᠧᠷᠲ ᠤᠨ ᠪᠢᠴᠢᠭ ᠤᠨ ᠭᠡᠷ ᠲᠤ ᠣᠪᠣᠭᠠᠷᠠᠭᠰᠠᠭᠠᠷ ᠪᠠᠶᠢᠵᠣ᠂ ᠪᠢᠴᠢᠭ ᠤᠨ ᠰᠢᠷᠡᠭᠡ ᠲᠠᠢ ᠨᠢ ᠰᠠᠴᠠᠭᠤᠯᠣᠭᠰᠠᠨ ᠭᠡᠳᠡᠭ ᠣᠯᠠᠮᠵᠢᠯᠠᠯᠳᠣ ᠶᠠᠷᠢᠶ᠎ᠠ ᠪᠣᠢ᠃ ᠭᠡᠳᠡᠯ᠎ᠡ ᠡᠨᠡ ᠬᠦ ᠣᠷᠠᠯᠢᠭ ᠢ ᠴᠢᠩᠭ᠎ᠠ ᠨᠢᠮᠪᠠᠢ ᠱᠠᠭᠠᠷᠳᠠᠳᠠᠭ ᠪᠠᠭᠰᠢ ᠨᠢ ᠶᠡᠷᠦ ᠲᠣᠯᠣᠭᠠᠢ ᠲᠣᠬᠢᠵᠦ ᠵᠦᠪᠰᠢᠶᠡᠷᠡᠳᠡᠭ ᠦᠭᠡᠢ᠃ ᠵᠦᠪᠬᠡᠨ ᠮᠠᠣᠫᠠᠰᠰᠠᠨ ᠳᠤ ᠵᠣᠬᠢᠶᠠᠨ ᠪᠦᠳᠦᠭᠡᠬᠦ ᠶᠢᠨ ᠦᠨᠳᠦᠰᠦᠨ ᠠᠷᠭ᠎ᠠ ᠪᠠᠷᠢᠯ ᠢ ᠲᠠᠶᠢᠯᠪᠣᠷᠢᠯᠠᠨ ᠦᠭᠴᠦ᠂ ᠲᠡᠭᠦᠨ ᠢ ᠣᠯᠠᠨᠳᠠ ᠣᠩᠰᠢᠨ᠂ ᠠᠷᠪᠢᠨ ᠪᠢᠴᠢᠵᠣ᠂ ᠰᠢᠷᠭᠠᠭᠤ ᠬᠠᠳᠠᠭᠤᠵᠢᠯᠳᠠᠢ ᠪᠣᠯᠪᠠᠰᠣᠷᠠ ᠭᠡᠵᠦ ᠵᠣᠷᠢᠭᠵᠢᠭᠤᠯᠳᠠᠭ ᠪᠠᠶᠢᠵᠠᠢ᠃ ᠲᠡᠷᠡ ᠪᠠᠰᠠ᠄ ︽ᠪᠢᠳᠡ ᠶᠠᠮᠠᠷ ᠨᠢᠭᠡᠨ ᠬᠡᠷᠡᠭ ᠪᠣᠳᠠᠰ ᠢ ᠲᠦᠷᠰᠦᠯᠡᠨ ᠪᠢᠴᠢᠬᠦ ᠳᠡᠭᠡᠨ ᠲᠡᠭᠦᠨ ᠢ ᠣᠨᠣᠪᠴᠢᠳᠠᠢ ᠰᠣᠩᠭᠤᠳᠠᠭ ᠦᠭᠡ ᠪᠠᠷ ᠬᠡᠯᠡᠶ᠎ᠡ ᠭᠡᠪᠡᠯ ᠭᠠᠭᠴᠠ ᠨᠢᠭᠡᠨ ᠨᠡᠷ᠎ᠡ ᠦᠭᠡ ᠶᠢ ᠬᠡᠷᠡᠭᠯᠡᠨ᠎ᠡ︔ ᠲᠡᠭᠦᠨ ᠳᠤ ᠬᠦᠳᠡᠯᠭᠡᠭᠡᠨ ᠣᠯᠭᠤᠶ᠎ᠠ ᠭᠡᠪᠡᠯ ᠭᠠᠭᠴᠠ ᠨᠢᠭᠡᠨ ᠦᠢᠯᠡ ᠦᠭᠡ ᠶᠢ ᠬᠡᠷᠡᠭᠯᠡᠨ᠎ᠡ︔ ᠲᠡᠭᠦᠨ ᠤ ᠰᠢᠨᠵᠢ ᠴᠢᠨᠠᠷ ᠢ ᠢᠯᠭᠠᠶ᠎ᠠ ᠭᠡᠪᠡᠯ ᠭᠠᠭᠴᠠ ᠨᠢᠭᠡᠨ ᠲᠡᠮᠳᠡᠭ ᠦᠭᠡ ᠶᠢ ᠬᠡᠷᠡᠭᠯᠡᠨ᠎ᠡ᠃ ᠡᠷᠬᠡᠪᠰᠢ ᠲᠠᠰᠣᠷᠠᠯᠳᠠ ᠦᠭᠡᠢ ᠰᠡᠳᠬᠢᠵᠦ᠂ ᠲᠡᠷᠡ ᠬᠦ ᠬᠠᠮᠤᠭ ᠤᠨ ᠣᠨᠣᠪᠴᠢᠳᠠᠢ ᠨᠡᠷ᠎ᠡ ᠦᠭᠡ᠂ ᠦᠢᠯᠡ ᠦᠭᠡ᠂ ᠲᠡᠮᠳᠡᠭ ᠦᠭᠡ ᠶᠢ ᠡᠷᠢᠵᠦ ᠣᠯᠳᠠᠯ᠎ᠠ ᠪᠣᠳᠣᠯᠬᠢᠯᠠᠬᠤ ᠬᠡᠷᠡᠭᠳᠡᠢ᠃ ᠲᠡᠮᠡᠢ ᠵᠦᠷᠢᠬᠦ ᠦᠭᠡᠢ ᠭᠡᠳᠡᠭ ᠲᠤ ᠨᠠᠶᠢᠳᠠᠵᠦ ᠪᠣᠯᠬᠤ ᠦᠭᠡᠢ᠃ ᠬᠦᠴᠢᠷ ᠠᠴᠠ ᠵᠠᠶᠢᠯᠠᠨ ᠲᠣᠳᠠᠭᠠᠵᠦ᠂ ᠣᠶᠢᠷᠠᠯᠴᠠᠭ᠎ᠠ ᠣᠳᠬ᠎ᠠ ᠲᠠᠢ ᠦᠭᠡ ᠦᠭᠦᠯᠡᠪᠦᠷᠢ ᠶᠢ ᠬᠡᠷᠡᠭᠯᠡᠵᠦ ᠬᠠᠰᠢ ᠶᠠᠰᠢ ᠦᠩᠭᠡᠷᠡᠭᠦᠯᠵᠦ ᠪᠣᠯᠬᠤ ᠦᠭᠡᠢ︾ ᠭᠡᠵᠦ ᠲᠠᠬᠢᠨ ᠲᠠᠪᠳᠠᠨ ᠶᠠᠷᠢᠵᠦ ᠪᠢᠯᠠ᠃ ᠡᠨᠡ ᠪᠣᠯ ᠣᠳᠬ᠎ᠠ ᠵᠣᠬᠢᠶᠠᠯ ᠤᠨ ᠲᠡᠦᠬᠡᠨ ᠳᠤ ᠠᠯᠳᠠᠷᠰᠢᠭᠰᠠᠨ ︽ᠭᠠᠭᠴᠠ ᠦᠭᠡ ᠶᠢᠨ ᠰᠣᠷᠭᠠᠯ︾᠎ ᠤᠨ ᠢᠷᠡᠯᠳᠡ ᠮᠦᠨ᠃ ᠬᠡᠵᠢᠶ᠎ᠡ ᠬᠤᠶᠢᠨ᠎ᠠ ᠨᠢ ᠮᠠᠣᠫᠠᠰᠰᠠᠨ ︽ᠦᠭᠡᠬᠦᠨ ᠪᠦᠮᠪᠦᠭᠡ︾ ᠭᠡᠳᠡᠭ ᠦᠭᠦᠯᠡᠯᠭᠡ ᠪᠠᠨ ᠪᠢᠴᠢᠵᠦ ᠪᠠᠭᠰᠢ ᠳᠠᠭᠠᠨ ᠬᠦᠷᠭᠡᠨ ᠦᠵᠡᠭᠦᠯᠬᠦ ᠳᠤ ᠹᠯᠦ᠋ᠪᠧᠷᠲ ᠰᠠᠶ᠋ᠢ ᠲᠣᠯᠣᠭᠠᠢ ᠲᠣᠬᠢᠵᠦ᠄ ︽ᠴᠢᠨᠦ ᠵᠣᠬᠢᠶᠠᠯ ᠴᠢᠨᠢ ᠦᠨᠦ ᠨᠢᠭᠡᠨᠳᠡ ᠪᠣᠯᠪᠠᠰᠣᠷᠠᠨ ᠭᠦᠢᠴᠡᠵᠡᠢ᠂ ᠣᠷᠴᠢᠯᠠᠩ ᠲᠡᠯᠡᠬᠡᠢ ᠳᠤ ᠨᠡᠶᠢᠳᠡᠯᠡᠵᠦ ᠣᠯᠠᠨ ᠲᠠᠢ ᠲᠠᠨᠢᠯᠴᠠᠭᠤᠯᠵᠣ ᠪᠣᠯᠣᠨ᠎ᠠ︾ ᠬᠡᠵᠡᠢ᠃ ᠦᠨᠡᠷᠡᠨ ᠭᠡᠮ᠂ ︽ᠦᠭᠡᠬᠦᠨ ᠪᠦᠮᠪᠦᠭᠡ︾ ᠨᠡᠶᠢᠳᠡᠯᠡᠭᠳᠡᠮᠡᠭᠴᠡ ᠪᠠᠨ ᠪᠦᠬᠦ ᠹᠷᠠᠨᠼᠢ ᠪᠣᠯᠣᠨ ᠪᠠᠷᠠᠭᠤᠨ ᠧᠦ᠋ᠷᠦᠫᠡ ᠶᠢᠨ ᠣᠳᠬ᠎ᠠ ᠣᠷᠠᠯᠢᠭ ᠤᠨ ᠲᠠᠪᠴᠠᠩ ᠢ ᠲᠣᠩᠰᠣᠯᠭᠠᠵᠦ᠂ ᠮᠠᠣᠫᠠᠰᠰᠠᠨ ᠳᠤ ᠰᠢᠯᠢᠳᠡᠭ ᠦᠭᠦᠯᠡᠯᠭᠡ ᠶᠢᠨ ᠵᠣᠬᠢᠶᠠᠯᠴᠢ ᠪᠣᠯᠬᠤ ᠪᠠᠶᠢᠷᠢ ᠰᠠᠭᠤᠷᠢ ᠶᠢ ᠲᠣᠭᠳᠠᠭᠠᠵᠦ ᠦᠭᠭᠦᠭᠰᠡᠨ ᠪᠠᠶᠢᠨ᠎ᠠ᠃ ᠬᠤᠵᠢᠮ ᠨᠢ ᠲᠡᠷᠡ ᠵᠢᠷ ᠤᠨ ᠬᠦᠮᠦᠰ ᠤᠨ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ ᠵᠣᠯ ᠵᠢᠷᠭᠠᠯ ᠭᠡᠵᠦ ᠦᠵᠡᠳᠡᠭ ᠵᠦᠢᠯ ᠢ ᠴᠦ ᠪᠠᠷᠤᠭ ᠣᠯᠵᠦ ᠡᠳ᠋ᠯᠡᠭᠰᠡᠨ ᠦᠭᠡᠢ᠂ ᠨᠢᠭᠡᠨ ᠣᠷᠠᠯᠢᠭᠴᠢᠨ ᠪᠣᠯᠣᠭᠰᠠᠨ ᠤ ᠬᠤᠪᠢ ᠳᠤ ᠲᠠᠷᠬᠠᠨ ᠡᠭᠦᠷᠭᠡ ᠪᠠᠨ ᠪᠡᠶᠡᠯᠡᠭᠦᠯᠬᠦ ᠪᠠᠷ ᠠᠯᠢᠪᠠ ᠪᠠᠨ ᠰᠢᠪᠬᠠᠨ ᠴᠢᠷᠮᠠᠶᠢᠵᠣ᠂ ︽ᠰᠣᠨᠳᠣᠷ︾᠂ ︽ᠮᠢᠨᠣ ᠠᠪᠠᠭ᠎ᠠ ᠯᠶᠦ᠋ᠯᠢ︾ ᠮᠡᠳᠦ ᠶᠢᠨ ᠠᠯᠢ ᠣᠯᠠᠨ ᠲᠡᠯᠡᠬᠡᠢ ᠳᠤ ᠠᠯᠳᠠᠷᠰᠢᠭᠰᠠᠨ ᠨᠠᠨᠳᠢᠨ ᠪᠦᠳᠦᠭᠡᠯ ᠢ ᠦᠯᠡᠳᠡᠭᠡᠵᠦ᠂ ᠲᠡᠯᠡᠬᠡᠢ ᠶᠢᠨ ᠭᠤᠷᠪᠠᠨ ᠶᠡᠭᠡ ᠦᠭᠦᠯᠡᠯᠭᠡ ᠶᠢᠨ ᠲᠠᠷᠬᠠᠨ ᠤ ᠨᠢᠭᠡᠨ ᠪᠣᠯᠣᠭᠰᠠᠨ ᠪᠢᠯᠠ᠃ ᠮᠠᠣᠫᠠᠰᠰᠠᠨ ᠠᠴᠠ ᠪᠢᠳᠡᠨ ᠳᠤ ᠪᠦᠳᠦᠭᠡᠵᠦ ᠦᠭᠭᠦᠭᠰᠡᠨ ᠦᠨ᠎ᠡ ᠦᠷᠳᠡᠭ ᠨᠢ ᠲᠡᠯᠡᠬᠡᠢ ᠶᠢᠷᠳᠢᠨᠴᠦ ᠳᠤ ᠦᠨᠢᠳᠡ ᠮᠦᠩᠬᠡᠷᠡᠨ᠎ᠡ᠃     ᠭᠤᠷᠪᠡ     ᠬᠡᠷᠪᠡ ᠪᠦᠷᠢᠨ ᠲᠡᠭᠦᠰ ᠬᠦᠮᠦᠨ ᠭᠡᠳᠡᠭ ᠢᠶᠠᠷ ᠪᠠᠷᠢᠮᠵᠢᠶᠠᠯᠠᠪᠠᠯ ᠲᠡᠯᠡᠬᠡᠢ ᠳ᠋ᠠᠬᠢᠨ ᠳᠤ ᠠᠮᠢᠳᠣᠷᠠᠵᠣ ᠪᠣᠯᠬᠤ ᠨᠢ ᠨᠢᠭᠡ ᠴᠦ ᠦᠭᠡᠢ ᠶᠣᠮ᠃ ᠣᠷᠠᠨ ᠵᠣᠬᠢᠶᠠᠯ ᠨᠢ ᠲᠡᠯᠡᠬᠡᠢ ᠶᠢᠨ ᠲᠦᠮᠡᠨ ᠪᠣᠳᠠᠰ ᠲᠦᠮᠡᠨ ᠬᠡᠷᠡᠭ ᠲᠠᠢ ᠠᠳᠠᠯᠢ ᠪᠠᠷ ᠶᠠᠮᠠᠷ ᠴᠦ ᠡᠮᠵᠡᠭ ᠲᠣᠳᠠᠭᠳᠠᠯ ᠦᠭᠡᠢ ᠪᠦᠷᠢᠨ ᠲᠡᠭᠦᠯᠳᠡᠷ ᠪᠠᠶᠢᠨ᠎ᠠ ᠭᠡᠵᠦ ᠪᠠᠷᠤᠭ ᠴᠢᠳᠠᠬᠤ ᠦᠭᠡᠢ ᠶᠣᠮ᠃ ᠭᠡᠪᠡᠴᠦ ᠣᠩᠰᠢᠭᠴᠢ ᠶᠢ ᠨᠢᠳᠦᠨ ᠳᠡᠭᠡᠨ ᠬᠠᠪᠴᠢᠬᠤ ᠦᠭᠡᠢ ᠵᠣᠬᠢᠶᠠᠭᠴᠢ ᠪᠣᠯ ᠡᠭᠦᠷᠢᠳᠡ ᠪᠣᠷᠣᠭᠤ ᠶᠣᠮ᠃ ᠬᠠᠭᠤᠮᠠᠭᠠᠢ ᠪᠦᠳᠦᠭᠦᠯᠢᠭ ᠣᠷᠠᠨ ᠪᠦᠳᠦᠭᠡᠯ ᠨᠢ ᠪᠦᠳᠦᠭᠦᠯᠢᠭ ᠶᠡᠷᠦᠮᠳᠡᠭ ᠰᠣᠨᠢᠷᠬᠠᠭᠴᠢ ᠶᠢ ᠬᠦᠮᠦᠵᠢᠭᠦᠯᠦᠨ᠎ᠡ᠂ ᠣᠬᠢ ᠰᠢᠯᠢᠳᠡᠭ ᠣᠷᠠᠨ ᠪᠦᠳᠦᠭᠡᠯ ᠨᠢ ᠬᠦᠮᠦᠰ ᠤᠨ ︽ᠣᠶᠣᠨ ᠰᠠᠨᠠᠭᠠᠨ ᠤ ᠬᠦᠨᠡᠰᠦ︾ ᠪᠣᠯᠵᠦ᠂ ᠯᠠᠪᠳᠠᠢ ᠰᠡᠴᠡᠨ ᠮᠡᠷᠭᠡᠨ ᠰᠢᠨᠵᠢᠨ ᠰᠣᠨᠢᠷᠬᠠᠭᠴᠢ ᠶᠢ ᠪᠣᠢ ᠪᠣᠯᠭᠠᠨ᠎ᠠ᠃ ᠵᠣᠬᠢᠶᠠᠭᠴᠢ ᠳᠤ ᠦᠨᠡᠨ ᠳᠡᠭᠡᠨ ᠡᠷᠬᠡ ᠰᠦᠷ ᠭᠡᠵᠦ ᠪᠠᠶᠢᠬᠤ ᠦᠭᠡᠢ ᠶᠣᠮ᠂ ᠭᠠᠭᠴᠠ ᠬᠦ ᠨᠢᠭᠡᠨ ᠦᠨᠡᠨᠴᠢ ᠴᠢᠭᠡᠴᠢ ᠰᠡᠳᠬᠢᠯ᠂ ᠠᠷᠠᠳ ᠲᠦᠮᠡᠨ ᠯᠦᠭᠡ ᠬᠠᠮᠳᠣᠳᠠ ᠴᠣᠬᠢᠯᠠᠵᠣ ᠪᠠᠶᠢᠭ᠎ᠠ ᠵᠢᠷᠦᠬᠡ ᠲᠠᠢ ᠪᠠᠶᠢᠵᠦ᠂ ᠪᠢᠷ ᠢᠶᠠᠨ ᠴᠢᠩᠭᠠᠬᠠᠨ ᠪᠠᠷᠢᠪᠠᠯ ᠵᠣᠬᠢᠨ᠎ᠠ᠃     ᠶᠡᠷᠦᠮᠳᠡᠭ ᠪᠣᠯᠬᠤ ᠳᠤ ᠬᠢᠯᠪᠠᠷ᠂ ᠣᠨᠴᠠᠭᠠᠢ ᠪᠣᠯᠬᠤ ᠳᠤ ᠬᠦᠴᠢᠷ ᠶᠣᠮ᠃ ᠦᠪᠡᠷ ᠢ ᠪᠠᠨ ᠦᠩᠭᠡᠷᠡᠦ ᠦᠨᠳᠦᠷ ᠨᠢᠰᠦᠭᠰᠡᠨ ᠦᠭᠡᠢ ᠭᠡᠵᠦ ᠪᠣᠳᠣᠳᠠᠭ ᠪᠦᠷᠭᠦᠳ ᠰᠠᠶ᠋ᠢ ᠣᠯᠠᠮ ᠦᠨᠳᠦᠷ ᠨᠢᠰᠬᠦ ᠪᠣᠯᠣᠯᠴᠠᠭ᠎ᠠ ᠲᠠᠢ ᠪᠢᠯᠠ᠃ ᠣᠳᠬ᠎ᠠ ᠵᠣᠬᠢᠶᠠᠯ ᠤᠨ ᠣᠨᠴᠠᠭᠠᠢ ᠬᠦᠷᠢᠶᠡᠨ᠎ᠡ ᠪᠢᠷ ᠪᠠᠷᠢᠭᠠᠳ ᠵᠣᠬᠢᠶᠠᠯ ᠪᠢᠴᠢᠳᠡᠭ ᠪᠦᠬᠦᠨ ᠠᠪᠣᠷᠭᠤ ᠵᠣᠬᠢᠶᠠᠯᠴᠢ ᠪᠣᠯᠵᠣ ᠴᠢᠳᠠᠨ᠎ᠠ ᠭᠡᠪᠡᠯ ᠪᠡᠶᠡᠯᠡᠰᠢ ᠦᠭᠡᠢ ᠶᠠᠪᠣᠳᠠᠯ᠃ ᠭᠡᠳᠡᠯ᠎ᠡ ᠲᠣᠮᠣ ᠮᠣᠳᠣ ᠨᠢ ᠵᠢᠯ ᠵᠢᠯ ᠨᠣᠭᠤᠭᠠᠨ ᠨᠠᠪᠴᠢ ᠣᠷᠭᠤᠳᠠᠭ ᠶᠣᠮ ᠭᠡᠬᠦ ᠳᠤ ᠨᠢᠯᠬ᠎ᠠ ᠨᠠᠬᠢᠶ᠎ᠠ ᠮᠦᠨ ᠵᠢᠯ ᠪᠦᠷᠢ ᠬᠦᠮᠦᠰ ᠲᠤ ᠬᠠᠪᠣᠷ ᠢ ᠮᠡᠳᠡᠭᠡᠯᠡᠳᠡᠭ ᠪᠢᠰᠢ ᠦᠦ︕ ᠣᠳᠬ᠎ᠠ ᠵᠣᠬᠢᠶᠠᠯ ᠤᠨ ᠨᠠᠷᠭᠢᠶᠠᠨᠳᠣ ᠬᠦᠷᠢᠶᠡᠯᠡᠩ ᠳᠤ ᠰᠠᠭᠯᠠᠭᠠᠷ ᠪᠦᠳᠦᠭᠦᠨ ᠲᠣᠮᠣ ᠮᠣᠳᠣ ᠪᠣᠯᠵᠣ ᠲᠡᠶᠢᠯᠬᠦ ᠦᠭᠡᠢ ᠴᠦ ᠠᠩᠭᠢᠯᠣᠮ᠎ᠠ ᠦᠨᠦᠷᠳᠦ ᠨᠢᠭᠡᠨ ᠪᠠᠭᠴᠠ ᠴᠡᠴᠡᠭ ᠪᠣᠯᠵᠣ ᠲᠡᠯᠭᠡᠷᠡᠪᠡᠯ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠳᠤ ᠭᠤᠸ᠎ᠠ ᠰᠠᠶᠢᠬᠠᠨ ᠢ ᠪᠡᠯᠭᠡᠯᠡᠵᠦ ᠲᠡᠶᠢᠯᠦᠨ᠎ᠡ᠃
 
ᠢᠷᠡᠯᠲᠡ᠄ ᠦᠪᠦᠷ ᠮᠣᠩᠭᠤᠯ ᠤᠨ ᠡᠳᠦᠷ ᠤᠨ ᠰᠣᠨᠢᠨ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠤᠶᠤᠨᠴᠢᠯᠠᠭᠰᠠᠨ ᠴᠠᠭ ᠦᠶ᠎ᠠ ᠳᠤ ᠨᠠᠰᠤᠳᠠᠶᠢᠴᠤᠳ ᠢᠶᠠᠨ ᠢᠯᠡᠭᠦᠭᠡᠨ ᠬᠠᠯᠠᠮᠵᠢᠯᠠᠵᠤ ᠪᠠᠶᠢᠶ᠎ᠡ
ᠬᠠᠷ᠎ᠠ ᠤᠬᠠᠭᠠᠨ ᠢᠶᠠᠷ ᠢᠶᠠᠨ ᠰᠤᠶᠤᠯᠵᠢᠬᠤ ᠭᠡᠬᠦ ᠠᠴᠠ
ᠨᠠᠶᠢᠷᠠᠭᠤᠯᠤᠯ— ᠭᠤᠤᠯ ᠤᠨ ᠲᠤᠬᠤᠢ
ᠪᠤᠰᠤᠳ ᠤᠨ ᠠᠮᠵᠢᠯᠳᠠᠳᠠᠢ ᠠᠷᠭ᠎ᠠ ᠲᠤᠷᠰᠢᠯᠭ᠎ᠠ ᠠᠴᠠ ᠰᠤᠷᠤᠯᠴᠠᠬᠤ ᠶᠢᠨ ᠤᠴᠢᠷ
ᠰᠢᠨ᠎ᠠ ᠵᠦᠢᠯ ᠢ ᠰᠤᠷᠴᠦ ᠡᠵᠡᠮᠰᠢᠬᠦ ᠨᠢ ᠴᠢᠬᠤᠯᠠ
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号